Maria Kainradl
Da Kuchlhead
Wias Herz in mein Leib da Mittelpunkt tuat sein,
wia am Himmel hoch drobm da Sunnenschein,
grod a so is in mein oltn Bauernhaus da Kuchlhead
zan Hausen olle Tag unendlich vül wert.
Do steht er gonz weiss, gsetzt vur 50 Johrn,
und nur vom Anschaun wird mir scho worm.
A große Plotten , wo Platz hot recht vül,
doß ma kochn kann a ausgiebigs und ordentlichs Menü.
Die Suppen, die lächelt am rechten Eck hinten,
in da Mittn tuat ma in Erdäpfel – und Krauthäfen finden,
etla Reindl und Pfandl zan Dünsten und Siadn ,
und a Pfann mit an Stiel, wann ma muaß wos fritiern.
Deis Fleisch, deis brat im untaufigen Rohr,
wird da so schön morb und durch und durch gor.
In da obnaufigen Röhrn tuat da Strudl schön bochn,
oder a softiga Guglhupf firn Kaffee außa lochn.
Im Wosserschiff, im sogenannten Mäu(r)l einbaut,
wird`s Wossa schön hoaß, wann ma oans braucht.
Und obn am Herdkopf liegen Hondschuh und Haubn,
wanns zab Abtricknen san, weil`s als a nassa nix taugn.
Die Spanscheidln hobn a do obn eanan Platz, dass nit roazt,
wann ma in da Fruah des Feuerl anhoazt.
Da Brottoag und Germtoag kimmt do aufi zan Gehn,
und a gonz olte Kaffeetassn tuat ols Zierde do stehn.
A Stückl unta da Herdplottn do is der Reschu,
zum Vorwärmen von Pantoffeln , Schlapfen und Schuh.
Abweichn muaß owa olls, wann man obgstochn haben,
weil do kimmt zum Schmolzauslossen die gonz große Pfann.
Sulz , Beuschl und Bluatwurst in große Häfn siat ,
do hoaßts ordentlich hoazn, doß die Herdplottn gliaht .
Dafür wird er nachher feinsäuberlich putzt und poliert,
dass er sich nach der hoaßn Ziet wieder regeneriert.
Und wann er am Nachmittag grod so lauwoam tuat sein,
a wenig den Hintern anwärmen – mei, des is schein.
Des Holz für mein Kuchlhead, dies bringt da Karl ins Haus.
Jeden Tog in da Früah johrein und johraus.
Kliabn tuat er`s im Winta mit seine wehigen Händ,
oba wanns eam a weh tuan, er is dies so gwöhnt.
Uns weil`s so gmüatlich is in da Kuchl, wo der Head steht,
holt ma uns olle duat auf und jeder gern einageht.
Drum gib i dir den guatn Rat: Tua Head sein in dein Leben,
strahl Wärm aus und gib Platz für alle daneben!
Weil wenn ma an Mittelpunkt hat, den ma schätzt und mag,
dann tuat ma si leichter mit dem, was sein muaß, alle Tag.
Texte © Copyright Maria Kainradl