Heidemarie Sixt

DA ZOAGER DA ZEIT

Wånn da Zoager da Zeit a weani långsåmer draht
und draußt, vor da Hütt´n da Schneewind herwaht,
nåcha hoaßt´s, er war då, da stülle Advent
gråd so wia ma eahm von früaha her kennt.

Wånn´s Kind in da Wiag´n die Äugerl sih reib,
und d`Muatta ban Tisch, schoa die Weihnåchtspost schreib.
Wånn´s Spand´lholz knistert im off´nen Kamin
und die Kåtz´n gånz faul neb´n da Of´nbånk lieg´n.

Wånn im Rohr - auf´m Blech - da Lebkuch´n wird
und ma drin in da Stub´m oan Hauch Weihnåcht´n spürt.
Wånn´s nåcha im Herz´n gånz woarm wird und staad,
håst dås G´fühl, dåß da Zoager sih långsåmer draht.

Texte © Copyright Heidemarie Sixt